كلنا تجينا أفكار ومشاريع ودنا نبنيها ونشوفها على أرض الواقع، ولكن غالباً يوقفنا شيء من الثلاثة: الخوف، قلة المال، أو قلة الخبرة في الوصول للعملاء ومعرفة الفئة المستهدفة. سواء كانت فكرتك مشروع تقني أو حل لمشكلة معينة أو حتى خدمة بسيطة. واللي يقهر إنك بعد فترة تشوف نفس فكرتك نفذها شخص ثاني ونجحت معه، وتقول بينك وبين نفسك: يا ليتني بدأت وقتها! وهذي أشوفها مشكلة عند كثير مننا، ولكن مثل ما يقولون لكل مشكلة حل. عشان كذا قررت أغير توجه منصة تدري بشكل أكبر. ما أبغى تدري تكون مجرد منصة تدخلها تتعلم كم مهارة وتطلع بشهادة وخلاص. ودي تكون مكان يجمع الأشخاص اللي عندهم طموح يبنون مشاريعهم، ويتعلمون كيف يحولون أفكارهم إلى منتجات حقيقية، والأهم يعرفون وين الفرص ووين الفلوس فعلياً. في بالي أجمع كل الخبرة اللي اكتسبتها خلال 12 سنة، من عملي مع شركات صغيرة وكبيرة إلى بناء مشاريعي الخاصة، وأحاول أنقل لكم التجارب اللي نجحت معي وحتى الأخطاء اللي كلفتني وقت ومال. والصراحة عندي هدفين من هذا التوجه: الأول: إني أشوف نتائج حقيقية لأعضاء المجتمع، وأشوف مشاريع بدأت من مجرد فكرة وتحولت لشيء موجود في السوق ويحقق دخل. الثاني: إني أدخل كشريك أو داعم في بعض المشاريع اللي أشوف فيها فرصة حقيقية للنجاح. ولكن هذا التغيير راح يغير حتى الأشخاص اللي نستهدفهم في تدري. ما عاد أبغى أستهدف الشخص اللي هدفه يتعلم الذكاء الاصطناعي لمجرد التعلم. أبغى الشخص اللي عنده هدف من التعلم. شخص عنده فكرة ويبغى ينفذها، أو عنده مشكلة ويبغى يحلها، أو حتى شخص ما عنده فكرة للحين ولكن عنده رغبة حقيقية إنه يبني مشروعه الخاص. وعشان كذا لأول مرة بقولها لكم: الدورة القادمة في تدري ما راح تكون مجرد دورة أساسيات ذكاء اصطناعي. بإذن الله راح تكون رحلة نبدأ فيها من الصفر، من فهم الفكرة ودراسة السوق ومعرفة العميل المستهدف، إلى بناء منتج حقيقي والاستعداد لإطلاقه. يعني ما أبغاك تطلع من الدورة وأنت بس تعرف تستخدم أدوات الذكاء الاصطناعي. أبغاك تطلع وأنت تعرف كيف تستفيد منها في بناء شيء يخصك. وفي نقطة مهمة أحب أوضحها من الآن. دورات الأساسيات راح يكون عليها خصومات وعروض، لأن هدفي أن المعرفة تكون متاحة لأكبر عدد ممكن. أما رحلة بناء المشاريع، فراح يكون لها تسعير مختلف يعكس حجم العمل والمتابعة اللي بنقدمها، ويكون مناسب للأشخاص الجادين في تنفيذ مشاريعهم.

خلوني أشارككم شي من تجربتي، ويمكن يخلي بعضكم يعيد التفكير في الهدف من تعلم الذكاء الاصطناعي. أنا شخصياً لما بدأت أتعلم الذكاء الاصطناعي كان عندي ثلاث أهداف، أولها إني أحصل على فرصة وظيفية أفضل، وثاني شي إني أزيد دخلي، وثالث شي إني أقدر أشتغل مع شركات وأحصل على عملاء. والحمدلله اليوم أقدر أقول إني حققت الثلاثة. حصلت على فرصة أكون شريك في تطبيق تقني متخصص في المجال الرياضي ويستخدم الذكاء الاصطناعي، وبرضوا بدأت أقدم دورات تعليمية وصارت مصدر دخل إضافي لي، غير المشاريع الجانبية اللي اشتغلت عليها مع شركات وأفراد. لكن ليش أقولكم الكلام هذا؟ لأن الصراحة أشوف ناس كثير تدخل مجال الذكاء الاصطناعي وتبدأ تتعلم كل أداة جديدة تطلع، وكل يوم دورة جديدة، لكن لو سألته أنت ليش تتعلم؟ ما عنده إجابة واضحة. ومو شرط يكون هدفك نفس هدفي، يمكن أنت موظف وتبغى ترقية، أو عندك مشروع وتبغى تطوره، أو حتى تبغى توفر وقتك في شغلك اليومي. اللي أبغى أوصله إنك قبل تبدأ تتعلم، اسأل نفسك إيش أبغى أحقق من الذكاء الاصطناعي؟ لأن مو معقول تقضي شهور تتعلم أدوات وتتابع أخبار وتجمع دورات وبالنهاية ما تعرف كيف تستفيد من كل اللي تعلمته. 👀 والحين عندي فضول أعرف منكم شي إيش هدفك أنت من تعلم الذكاء الاصطناعي؟ هل هو وظيفة، دخل إضافي، مشروع خاص، أو شي ثاني؟ وإذا بدأت تتعلم من فترة، هل وصلت للهدف اللي كنت تبغاه؟ شاركوني، ودي أشوف تجاربكم ❤️