غزوة مؤتة · Al Mahero

غزوة مؤتة

💢خرج المسلمين للغزوة و عددهم ٣٠٠٠ فقط بقيادة زيد بن حارثة و وصلت لهم أخبار أن الغساسنة و الرومان هيحاربوا ب ٢٠٠ ألف مقاتل .. فوقف سيدنا زيد بن حارثة و جمع الجيش و قال : " أشيروا علي أيها الناس " ، فقال واحد منهم : " أيها الأمير أرى أن المعركة غير متكافئة و أرى أن ننسحب "، فقام رجل تانى قايل : " ويحك ما تقول ؟! أنعود إلى رسول الله .. ونقول تركنا أمرك ؟! " ..

فوقف واحد كمان و قال : " نبعث إلى رسول الله رسالة و نسأله مدد "..

فوقف عبد الله بن رواحة و قال : " أيها الناس ما بكم ! إنكم خرجتم من أجل الشهادة .. أيها الناس نحن معاشر المسلمين لا نقاتل بعدد و لا بعدة ولا بجيش ، و إنما نقاتل بالله و بهذا الدين " .. فقالوا : " صدقت يابن رواحة " ❤️

وثبت المسلمون و إستعدوا للقتال 💪✋

ومن أداب الحرب إن اللى يوصل الأول من الجيوش هو من يختار مكان المعركة .. فوصل المسلمين قبل الغساسنة و أختاروا مكان ضيق للقتال بحيث ميقدرش كل جيش الغساسنة الدخول فيه لقتال المسلمين .. فساعتها مينفعش يدخل إلا عدد مساوى لعدد المسلمين وده كان ذكاء و حسن تخطيط من المسلمين لأنهم لو حاربوا الغساسنة بعددهم الكبير ده فى الصحراء الواسعة فهيكون معناه هلاك المسلمين لأن العدد غير متكافئ ..

💢وصل جيش الغساسنة ولقوا المسلمين سبقوا و أختاروا المكان .. و فعلا أضطرت الغساسنة يقسموا جيشهم على مجموعات كل مجموعة ٣٠٠٠ مقاتل و لكن فى صفوف ورا بعض ، و نجحت خطة المسلمين بس في مشكلة إن ال ٣٠٠٠ مقاتل الأولانيين بتوع الغساسنة ، وراهم ٣٠٠٠ تانيين .. فكل ما يتعبوا يطلع بدالهم المجموعة اللى وراهم و هكذا ، أما جيش المسلمين مبيرتاحوش و لا بيتغيروا .. هما ٣٠٠٠ فقط من بداية المعركة لآخرها 😔

طب هيقدروا يثبتوا أد إيه قدام العدد الكبير ده ؟🤔

هيثبتوا لمدة ٦ أيام كامله .. وخسائر الأرواح عند المسلمين بالعشرات و عند الغساسنة بالآلاف 🤗💪

فبعد كل المدة دى الغساسنة لقوا إن كده مش نافع ، المسلمين ثابتين زي الجبال كأنهم مبيتعبوش ..

فقال قائد الغساسنة : " عليكم بصاحب هذه الراية ..

يقصد مين ؟ 🤔.. يقصد سيدنا زيد بن حارثة 😔

لأن القائد لما بيموت بتتهز الروح المعنوية لجيشه فبتنتهى المعركة .. لكن النبى حبيبنا عليه الصلاة و السلام عامل حسابه و قال إن لو زيد مات يتولى جعفر القيادة وهكذا ..

💢و فى اليوم السابع للمعركة كل جيش الغساسنة هدفهم قتل زيد بن حارثة 😔✋ .. و فى اللحظة دى النبى ﷺ فى المدينة قلقان عليهم و نفسه يعرف أخبارهم .. فتحصل معجزة بإن يبدأ النبى ﷺ ينقل للناس أحداث الغزوة و كأن ربنا رفع له أرض المعركة فبقى شايف اللى بيحصل فيها و هيه فى أرض الشام .. و دى كانت من المعجزات الدالة على أنه رسول الله ﷺ ❤️❤️❤️

فقال ﷺ : " أخذ زيد الراية و قاتل و وقع شهيدآ ، سقطت الراية .. فأخذ الراية جعفر بن أبي طالب و أراه يقاتل و يقاتلونه فأجتمعوا عليه وضربوا يده اليمنى فقطعوا ذراعه الأيمن ، فسقطت الراية ، فنزل جعفر وأخذ الراية بيده اليسرى ، قطعوا ذراعه الأيسر ، فما تبقى من ذراعيه إلا العضدين ( المنطقة اللى فوق الكوع 😔 ) ، فأنحنى جعفر و أخذ الراية بعضديه ، فضربوه بالسيف ..

و بدأ النبي ﷺ يبكي على جعفر 😥😥

و قال ﷺ : " قتلوه و مات شهيدآ ، و أراه الآن في الجنة ، و أبدله الله جناحين يطير بهما في الجنة حيث يشاء " 😔

الصحابة لما عرفوا كده سموه " بجعفر الطيار "..

و كانوا بينادوا إبنه و يقولوله يا إبن ذى الجناحين ❤️ ..

رضي الله عنه وأرضاه وكل صحابه رسول الله ﷺ❤️

❤️❤️❤️❤️❤️صلوا على النبي ❤️❤️❤️❤️❤️

💢كده أتقتل القادة اللى النبى ﷺ وصى أنهم يحملوا راية الإسلام .. مات سيدنا زيد و مات بعده سيدنا جعفر ، و بيحكى سيدنا " عبد الله بن عمر " إنه لاقى ٥٠ طعنة فى جسم جعفر و مفيش ولا واحدة فيهم بضهره و ده دليل إنه مفكرش لحظة إن يرجع لكن فضل يواجه القتال 💪 ..

و يكمل النبى ﷺ و ينقل أحداث المعركة بمعجزة زى ما قلنا للمسلمين اللى معاه فى المدينة و يقول : " مات جعفر و سقطت الراية فحملها عبد الله بن رواحة و قاتل فوقع شهيدآ و سقطت الراية " و سكت النبى ﷺ ✋..

فالمسلمين مستنيين .. و بيسمعوا الكلام فى زهول و خوف خايفين الجيش ينهزم 😔

و فجأة قال النبى ﷺ : " و قد حمل الراية سيف من سيوف الإسلام ❤..يا ترى النبى يقصد مين ؟ " ..

أصل لما مات عبد الله بن رواحة ، محدش عارف مين اللى هيبقى القائد بعد كده .. فطلع واحد أسمه " ثابت بن الأقرم " و قام شايل الراية وجرى بيها على سيدنا خالد بن الوليد و قال له : " كن علينا قائد و خذ الراية " ،

فقال خالد : " لا والله أنا لا أستحقها " ،

فقال ثابت : " لماذا ؟ " ..

فقال خالد : " أنت أسلمت قبلي و حاربت مع رسول الله في غزوة بدر و أنا كنت كافر مشرك ، أقاتلكم و أصد عن سبيل الله ، أنا لا أستحقها ، خذها أنت يا أخي "..

( أصل سيدنا خالد أسلم يدوب من ٣ شهور و هو مش إنسان عادى ده محارب عظيم قبل و بعد الإسلام لكن شوفوا تربية النبي ﷺ .. النبى ﷺ مرديش يخليه قائد من أول المعركة عشان ميدخلش فى قلبه الكبرياء و عشان سيدنا خالد يربط الأنتصار بالله لكن مش بمهارة القائد ) ..

فالمهم أصر الرجل و كل المسلمين أصروا إن سيدنا خالد ياخد الراية ✋ ..

فحمل خالد الراية و قال الله أكبر ، فقال النبي ﷺ في المدينة : " أخذ الراية الآن سيف من سيوف الله ، يفتح الله على يديه ، فقد أخذ الراية الآن خالد بن الوليد " .. و من هنا النبى ﷺ لقب خالد بسيف الله المسلول ❤ 🤗

💢إشتعلت المعركه من جديد وكان من قوة القتال و طول المعركة بيحكى سيدنا خالد و يقول : " تكسرت فى يدى ٩ سيوف " ( تخيلوا !! يعنى يحارب بيه كتير كتير و يتكسر و ياخد غيره ) .. شايفين جيش المسلمين ثابت أوى لكن بذل مجهود كبير و كمان الأكل بدأ يخلص .. و لو المسلمين كملوا المعركة هيبقى شئ مش حكيم أبدآ .. و لو إنسحبوا .. هيدخلوا الصحرا و يدوب بعد لحظات هيحاوطهم الغساسنة و هتحصل إبادة للمسلمين .. ففضل سيدنا خالد يفكر لحد ما وضع خطة بتدرس لحد دلوقتى في أوروبا 🤗

كانت أعظم خطة إنسحاب عرفتها البشرية 👌 ..

الخطة هدفها هى إن المسلمين ينسحبوا من غير ما الغساسنة يتبعوهم و يحاوطوهم ✋ ..

فجمع سيدنا خالد الجيش ، و خلى الفرقة اللى فى ميمنة الجيش تبدل مكانها مع ميسرة الجيش و الفرقة اللى فى مقدمة الجيش تتبدل مع مؤخرة الجيش .. و وصى كل الجيش إنه ينضف ملابسه و يهندم شكله و يسرح شعره .. عشان الغساسنة يفتكروا إن النبى ﷺ بعت مدد يعنى جيش جديد يساعد باقى جيش المسلمين ..

💥 أصل الميمنة في جيش الغساسنة حفظت شكل الجنود اللى فى ميمنة جيش المسلمين .. و الميسرة نفس الحكاية ، لأنهم بقالهم ١٠ أيام بيحاربوا بعض فحفظوا بعض .. و باقى الخطة هى أن سيدنا خالد سحب ٣٠٠ فارس من جيش المسلمين و قسمهم لفرق كل فرقة منهم تقف بعيد على تلال كده صغيرة و وصاهم يفضلوا يتحركوا كتير عشان يحصل غبار فالغساسنة يحسوا إن عدد المسلمين كبير و إن فى مدد وصل 🤗✋ ..

💢و فعلا تانى يوم جه جيش الغساسنة و بصوت عالى ينادى سيدنا خالد على المسلمين : " الله أكبر الله أكبر ".. و تبدأ الكتائب تتحرك و تعمل غبار .. فأرتبك جيش الغساسنة و لاقى شكل الناس متغير و شكلهم مدد جديد .. فأنخفضت الروح المعنوية عندهم جااامد و خافوا جداً ..

و بدأت المعركة فى قتال شديد و قوة من المسلمين و فجأة نادى سيدنا خالد فى المسلمين تانى و قال : " يا عباد الله إنسحبوا .. عودوا عودوا "..

فوقف قادة الغساسنة يقولون : " لا تتبعوا المسلمين"

( كمين ..كمين ) ، أصل الغساسنة شايفين أن مدام المسلمين جابوا جيش جديد فيبقى القديم اللى بيحارب بقالوا أسبوع .. راح فين !! يبقى أكيد مستخبى و الإنسحاب ده مكيدة هدفها إننا نروح ورا المسلمين ويبقى كمين 🤚

خطه في منتهى الذكاء من سيف الله المسلول 🤗❤️

و بكده نجحت خطة سيدنا خالد رضى الله عنه لأن الحقيقة إن مفيش جيش جديد و لا حتى فى كمين و رجع جيش المسلمين فى أمان للمدينة و فضلت الغساسنة مكانها .. مستنيه الكمين 🤗 😁 ..

💢طيب الإنسحاب ده إنتصار ؟

أيوه لأن النبى ﷺ قال على خالد لما خد الراية : " أخذ الراية سيف من سيوف الله يفتح الله على يديه " ،

يعنى ده يدل إن الإنسحاب ده نصرة و فتح و خطوة للمسلمين فى سبيل الله ❤️ ..

وبعدين المسلمين كدا خلاص اخدوا بثأر صاحبهم اللي اتقتل غدر واسقطوا الكثير من الكفار..ورجعوا سالمين ❤️

و بكده خلصت أحداث "غزوة مؤتة "

نقلا عن أستاذة نورهان الشيخ.. بتصرف..

0 comments