حاليا جالس اشتغل مع إحدى الشركات الناشئة على مشروع أشوفه من أجمل التجارب اللي مريت فيها، وهو نقل الشركة من نموذج عمل بدائي إلى نموذج يعتمد بشكل كبير على الذكاء الاصطناعي. طيب ايش الهدف من المشروع؟ ١- تقليل التكاليف التشغيلية. ٢- تقليل الاعتماد على الموظفين غير الأكفاء. ٣- التركيز على تطوير الشركة ونموها. ٤- تسليم المهام الروتينية والمتكررة للذكاء الاصطناعي. المشروع هذا شغالين عليه من ٧ أشهر تقريباً، وتخيل معي كأننا نسوي عملية جراحية لشركة ربحانة وما عندها مشاكل مالية، ولكن المشكلة في نموذج العمل نفسه! شركة تعتمد بشكل شبه كامل على Google Sheets في إدارة أعمالها، ونبغى نحولها إلى شركة تقنية رائدة في مجالها. والتحدي الأكبر بالنسبة لنا كان كيف نسوي كل هذا دون ما نأثر على سير العمل أو نخسر العملاء. والحمد لله اليوم وصلنا إلى نسبة إنجاز ٩٠٪، ودون أي مشاكل تُذكر. طيب ايش تستفيد أنت من كلامي هذا كله؟ إذا أنت موظف: وللحين ما بدأت تطور من نفسك وتتعلم كيف تستخدم الذكاء الاصطناعي في عملك، فأحب أقول لك إن الشركات اليوم جالسة تشتغل على تقليل اعتمادها على الموظفين في كثير من المهام، وأنا أعي تماماً الكلام اللي أقوله. مو شرط يتم استبدالك بالكامل، ولكن ممكن شخص واحد يعرف يستخدم الذكاء الاصطناعي صح ينجز شغل كان يحتاج عدة موظفين. وإذا أنت صاحب مشروع: ترى منافسينك مو جالسين ينتظرونك! فيه شركات اليوم جالسة تقلل مصروفاتها التشغيلية، وتسرّع إنجاز أعمالها، وتستثمر الوقت والمال اللي وفرته في تطوير منتجاتها وخدماتها. وكل هذا بمساعدة الذكاء الاصطناعي. يعني ممكن منافسك يقدم خدمة أفضل منك، وبتكلفة أقل منك، وفي وقت أسرع منك. والسبب ببساطة إنه عرف كيف يستفيد من التقنية قبلك. اللي أبغى أوصله لك: سواء كنت موظف أو صاحب مشروع، أنت في الحالتين كسبان لو تعلمت الذكاء الاصطناعي صح، والعكس صحيح. والسوق اليوم مليان فرص، ولكن الفرص هذه ما راح تنتظرنا للأبد. وأنا أشوف إن أكبر خسارة ممكن تخسرها اليوم مو إنك تجرب وتفشل، بل إنك تشوف كل هالتغييرات قدامك وتقرر إنك ما تتعلم. ممكن بعد كم سنة ترجع وتقول يا ليتني بدأت من وقتها. وفي النهاية الرزق على الله سبحانه، ولكن لازم نعمل بالأسباب.