Sep 3 (edited) • News & Updates
AI ဝင်လာရင် Social Media ဘာဖြစ်သွားမလဲ သိထားသင့်တဲ့ အချက် ၅ ချက်
ကဲ... ပြောရရင် Meta တို့ X တို့က AI ကို အသည်းအသန်လုပ်နေကြပြီ။ တခြား social app တွေကလည်း ဒီရေစီးကြောင်းထဲ ပါဖို့ ကြိုးစားနေကြတယ်။ ဆိုတော့ social media ရဲ့ အနာဂတ်က ဘယ်လိုဖြစ်မလဲ။ ကျနော်တို့ အချင်းချင်း ပေါင်းသင်းဆက်ဆံပုံတွေရော ဘယ်လိုပြောင်းသွားမလဲ။
ဘယ်လိုပဲကြည့်ကြည့်ပါ၊ social media ဆိုတာ အခုခေတ်မှာ မရှိမဖြစ်အရေးပါတဲ့ အရာတစ်ခု ဖြစ်နေပြီလေ။ Facebook သုံးတဲ့သူချည်းပဲ ကမ္ဘာပေါ်မှာ သန်း ၃,၀၀၀ ရှိတယ်နော်။ ကမ္ဘာ့လူဦးရေရဲ့ ၃၇% တောင်ရှိတယ်။ ဒါတောင် တရုတ်လိုနိုင်ငံတွေမှာ သုံးလို့မရတာ၊ အင်တာနက်မရှိတဲ့နေရာတွေကို ထည့်မတွက်သေးဘူး။
အဲ့ဒီလို platform ကြီးထဲကို Meta က AI bot တွေကိုပါ ထည့်လိုက်မယ်ဆိုရင် ဘာတွေဆက်ဖြစ်မလဲ။
Engagement တက်တာ Meta အတွက်တော့ ကောင်းတာပေါ့။ ဒါပေမဲ့ ဒီ bot တွေကို စာပြန်ရိုက်နေတဲ့ ကျနော်တို့လို တကယ့်လူတွေအတွက်ရော ကောင်းရဲ့လား။ ဒါက စဉ်းစားစရာတွေထဲက တစ်ခုပဲ။
ကဲ... အဓိက စဉ်းစားရမယ့် အချက် ၅ ချက်ကို ကြည့်လိုက်ကြရအောင်။
၁။ AI Character တွေ ဝင်လာတော့မယ်
လူတစ်ယောက်လိုပဲ post တွေတင်၊ comment တွေဝင်ရေးမယ့် AI character တွေ ထည့်မယ်ဆိုပြီး Meta က ပြောလာတယ်။ ဒီသတင်းကြားတော့ လူတော်တော်များများ လန့်သွားကြတယ်။
ဒါပေမဲ့ ဒါက အသစ်အဆန်းကြီးတော့လည်း မဟုတ်ပါဘူး။ ကိုယ့် post တွေအောက်မှာ bot တွေက ဝင် interact လုပ်နေတာ နှစ်တွေနဲ့ချီနေပြီ။ အခုဆို AI character တွေက live လွှင့်ပြီး ဈေးတောင်ရောင်းနေကြပြီလေ။
ဒီလို AI character တွေထည့်တာက သူတို့အတွက်တော့ ယုတ္တိရှိတယ်။ ဘာလို့လဲဆိုတော့ လူတွေက ကိုယ့် follower အရေအတွက်တွေ တက်၊ like တွေအများကြီးရတော့ ပျော်တာပေါ့။ အဲ့ဒီ dopamine hit ကို လူတွေက သဘောကျတယ်။ သုံးတဲ့သူအများစုကလည်း ကိုယ့် follower အရေအတွက် တက်နေသမျှ ဒါက လူအစစ်လား၊ bot လားဆိုတာ သိပ်ခေါင်းထဲထည့်မှာမဟုတ်ဘူး။
Meta အတွက်တော့ ဒါက နိုင်ကွက်ပဲ။
ဒါပေမဲ့ စဉ်းစားစရာက AI bot တွေနဲ့ တကယ်ခင်သွားပြီး အဖော်အဖြစ် မှီခိုလာတဲ့အခါ ဖြစ်လာနိုင်တဲ့ စိတ်ကျန်းမာရေး ပြဿနာတွေပဲ။ ဒီလိုဖြစ်လာရင် လူတွေနဲ့ ပိုကင်းကွာသွားပြီး တစ်ယောက်တည်း ပိုဖြစ်လာစေနိုင်တယ်။ ဒီလောက်ကြီးတဲ့ platform တစ်ခုအနေနဲ့ ဒီလိုကိစ္စတွေကို သေချာမလေ့လာဘဲ ရှေ့တိုးလုပ်တာကတော့ အန္တရာယ်များတယ်။ ဒါပေမဲ့ သူတို့ကတော့ လုပ်မှာပဲဆိုတာ ကျနော်တို့လည်း သိနေတာပဲလေ။
၂။ သတင်းအမှားတွေနဲ့ ဦးနှောက်ခြောက်စရာတွေ
နောက်တစ်ခုက သတင်းအမှားတွေပဲ။ တကယ်မဖြစ်ခဲ့တဲ့ အဖြစ်အပျက်တွေကို မဟုတ်မမှန်လုပ်ထားတဲ့ AI ပုံတွေ၊ ဗီဒီယိုတွေနဲ့ လူတွေကို လှည့်စားတာမျိုးပေါ့။
တော်သေးတာက အခုထိတော့ ထင်သလောက် မဆိုးသေးဘူး။ AI နဲ့လုပ်ထားတဲ့ပုံတွေက သိပ်မကောင်းသေးတာရယ်၊ platform တွေက ကြိုတင်စစ်ဆေးတာတွေကြောင့်ပါ။ ဒါပေမဲ့ AI တွေက တစ်နေ့တခြား ပိုကောင်းလာမှာဆိုတော့ ဒါက စိတ်ပူရမယ့်ကိစ္စပါ။
ဒါပေမဲ့ ပိုစိုးရိမ်ရမှာက အဲ့ဒါမဟုတ်ဘူး။ ကျနော်တို့က အချက်အလက်တွေသိချင်လို့ AI chatbot တွေကို မေးတဲ့အခါ၊ အဲ့ဒီအဖြေတွေကနေတစ်ဆင့် ကိုယ့်အတွေးအခေါ်တွေကို မသိမသာ လမ်းကြောင်းပြောင်းသွားတာမျိုးပဲ။ ဓာတ်ပုံအလိမ်တွေထက် ဒါက ပိုပြီး အန္တရာယ်များနိုင်တယ်။
၃။ လူတိုင်း ဖန်တီးနိုင်လာတယ်
ကောင်းတဲ့ဘက်ကကြည့်ရင် AI ကြောင့် ဘယ်သူမဆို အနုပညာဖန်တီးလို့ရလာတယ်။ ဂီတပညာမတတ်လည်း သီချင်းလုပ်လို့ရမယ်၊ ရုပ်ရှင်ပညာမသင်ဖူးလည်း ဗီဒီယိုအတိုလေးတွေ ဖန်တီးလို့ရမယ်။ ကိုယ့်ခေါင်းထဲက စိတ်ကူးတွေကို အလွယ်လေး ပုံဖော်လို့ရသွားပြီ။
ဒါပေမဲ့ တစ်ဖက်မှာလည်း အနှစ်သာရမရှိတဲ့ content အပေါစားတွေနဲ့ ပြည့်သွားနိုင်တယ်။ တကယ့်အနုပညာဆိုတာ သင်ယူမှု၊ လေ့ကျင့်မှု၊ အတွေ့အကြုံတွေ အများကြီးလိုတယ်။ တကယ့်အနုပညာဆိုတာ လူသားရဲ့ နှလုံးသား၊ ခံစားချက်နဲ့ ဇာတ်လမ်းပါမှလေ။ AI က အဲ့ဒါကို ဖန်တီးပေးနိုင်မှာမဟုတ်ဘူး။
၄။ ကိုယ့်ကိုယ်စား အလုပ်လုပ်ပေးမယ့် AI Agent တွေ
AI ရဲ့ နောက်တစ်ဆင့်က ကိုယ့်ကိုယ်စား အလုပ်လုပ်ပေးမယ့် 'Agent' တွေပဲ။ ကိုယ်က ခရီးသွားချင်တယ်ဆိုရင် ကိုယ့်စိတ်ကြိုက် booking လုပ်ပေးတာမျိုး၊ အလုပ်အတွက် လူရှာပေးတာမျိုးတွေ လုပ်ပေးမှာ။
ဒါက marketing လောကအတွက်တော့ အပြောင်းအလဲကြီးတစ်ခုပဲ။ ဘာလို့လဲဆိုတော့ လူတွေက ကိုယ်တိုင်မရှာတော့ဘဲ AI agent ကို ရှာခိုင်းတော့မှာမို့လို့ပဲ။ အဲ့ဒီအခါ ကိုယ့် brand က user ရဲ့ 'စိတ်ကြိုက် preference' စာရင်းထဲမှာ မရှိရင် အဲ့ဒီ AI agent က ကိုယ့်ကို ရွေးတော့မှာမဟုတ်ဘူး။ ဒါကြောင့် customer service ကောင်းကောင်းပေးပြီး လက်ရှိ customer တွေကို သေချာထိန်းထားဖို့က အရင်ကထက် ပိုအရေးကြီးလာတော့မှာ။
၅။ ကြော်ငြာတွေ ပိုကောင်းလာမယ်
နောက်ဆုံးအချက်ကတော့ ကြော်ငြာတွေပဲ။ AI က လူတွေထက် ပိုကောင်းအောင် ကြော်ငြာတွေကို target ထားနိုင်နေပြီ။
နောက်ဆိုရင်တော့ ကိုယ့် product link လေးပေးလိုက်ရုံနဲ့ AI က ကြော်ငြာ campaign တစ်ခုလုံးကို အစအဆုံး ဖန်တီးပေးသွားလိမ့်မယ်။
ဒါပေမဲ့ အဲ့ဒါက product ရောင်းဖို့အတွက်ပဲ အဆင်ပြေမှာ။ လူတွေရဲ့စိတ်ထဲ စွဲသွားစေမယ့် brand တစ်ခုဖြစ်ဖို့ကတော့ တီထွင်ဖန်တီးနိုင်စွမ်းနဲ့ ဇာတ်လမ်းကောင်းကောင်းပြောနိုင်တဲ့ လူသားတွေပဲ လိုအပ်နေဦးမှာပါ။ AI က အဲ့ဒါကို အစားထိုးနိုင်မှာမဟုတ်ဘူး။
အနှစ်ချုပ်ရရင် AI ကြောင့် အများကြီးပြောင်းလဲတော့မှာမို့ သူ့အကြောင်းကို စလေ့လာထားဖို့လိုပါပြီ။ ဒါပေမဲ့ လူသားအချင်းချင်းရဲ့ ဆက်သွယ်မှုကိုတော့ စက်တွေက အစားထိုးနိုင်မှာမဟုတ်ဘူးဆိုတာကိုတော့ စိတ်ချထားလို့ရပါတယ်။
0
1 comment
AI ဝင်လာရင် Social Media ဘာဖြစ်သွားမလဲ သိထားသင့်တဲ့ အချက် ၅ ချက်
powered by
skool.com/fyi-marketing-media-8946
FYI က Business နဲ့ AI လောကရဲ့ Trend အသစ်တွေနဲ့ သတင်းတွေကို မြန်မာဘာသာနဲ့ ပြန်ဝေမျှပေးနေပါတယ်။ ဝင်ခွင့်ရဖို့ m.me/fyi.news ကို စာပို့ပေးပါ။
Suggested communities
Powered by